Muestra d’espectáculos

Cuando les lluces del Paraísu s’apaguen, Löve vuelve a percorrer los pasillos del burdel sórdidu onde trabayaba. Desapaeció hai cuasi 10 años. Esfumóse ensin más. Como si la tragare la tierra.

El misteriu alredor de la so desapaición nun fixo más qu’aumentar la so lleenda. ¿Quién yera esa muyer de la que nun sabemos siquiera’l nome verdaderu? ¿Cómo llegó a esa situación? ¿Por qué naide denunció la so desapaición? ¿Qué secretos guarden aquellos que tovía la recuerden?

Güei’l públicu tien la posibilidá de reconstruyir la so historia, pero pa eso va tener que s’adientrar nel armazón criminal tan complexu que sostién el negociu del sexu de pagu nel nuestru país.

La compañía:

Con Alevosía Teatro ye una compañía profesional asturiana fundada en Llaviana nel 2005. Baxo la dirección d’Ernesto González, apuesta pola creación d’esperiencies escéniques que conecten col públicu d’una manera única, orixinal y fonda.

Nos sos 19 años d’historia, estrenaron 31 espectáculos de formatu mui variáu, dende grandes clásicos a espectáculos de cai, con propuestes pa públicu mozo o microteatru.

Centraos na busca de formes nueves d’espresión, nel 2015 dan un xiru fundamental cola estrena de NANÄ, el so primer espectáculu de teatru d’inmersión y d’entós p’acá especializáronse nesta tendencia tan singular, creando espectáculos inmersivos pa espacios non convencionales; propuestes orixinales y siempre sorprendentes que foron quién a atrayer al públicu de manera masiva.

Ficha artística:

• Autora del textu: Paula Moya
• Autor del espectáculu: Con Alevosía Teatro
• Intérpretes: Paula Moya, Sara Montes, Paola Rodríguez, Bea Canteli, Fini Sión, Ernesto González, Javier del Canto, Javier Cuetos, Salva García