Muestra d’espectáculos

Ursus, el protagonista de la nuestra historia, sal de la cueva en primavera, depués del iviernu fríu. Descubre que’l mundu que conocía cambió dafechu. El monte yá nun existe. En cuenta d’eso, una fábrica triste y escura álzase enllenando’l cielu de fumu. Los, pa él, habitantes de la fábrica, tan raros, fáenlu duldar de que ye un osu. Porque pa ellos, los osos namás viven en circos y zoolóxicos. ¿Será verdá? Ursus entama un viaxe bien llargu per estos sitios.

Va conocer a otros animales, a persones de toles menes. ¿Será quién a saber quién ye de verdá? Con títeres de mesa, marionetes, títeres de variella, mázcares, trabayu actoral y música en directo, creóse esta historia, basada nel testu El oso que nun yera de Frank Tashlin.

La compañía:

Creada en 1990, la compañía Yheppa desenvuélvese dende lo primero como colectivu d’investigación y esperimentación de dellos medios d’espresión que s’interrellacionen y integren l’arte escénicu: el soníu, la música, la palabra, la lluz y la escuridá, el llinguaxe de los oxetos, los títeres, el cuerpu.

Constructores de los sos propios títeres, vienen collaborando con otros artistes, instituciones educatives, colectivos sociales y ONG nel ámbitu relativu al títere como arte y educación.

Yheppa tien creaos y llevaos a la escena 34 espectáculos. Nellos esploraron y desenvolvieron técniques diverses d’espresión (teatru mistu, teatru negru, instalaciones teatrales, teatru na cai, nos museos...), amás de munches combinaciones nes técniques d’animación de títeres (guante, variella, bocones, marionetes, mesa, solombres, xigantes...). Con ellos percorrieron los caminos dientro y fuera de les nuestres fronteres.

Ficha artística:

• Titiriteru y actor: Carlos Díez Fernández
• Músicu: Neftalio Llanos Hernández
• Adaptación y guion: Yolanda Diana Marcos
• Construcción de títeres: Carlos Díez
• Escenografía: Carlos Díez
• Diseñu de pintura de títeres y escenografía: Forma
• Diseñu gráficu: Forma
• Dirección: Yolanda Diana Marcos
• Lluz y soníu: Carlos Díez y Neftalio Llanos