Muestra d’espectáculos

Nel escenariu de la existencia, ¿qué nos impulsa a avanzar? ¿Ye namás l’actu de poner un pie delantre del otru, o hai una fuercia más fonda que nos emburria p’alantre? Nesta travesía de la vida, cuatro intérpretes dan vida a una reflexón sobre la busca eterna de la felicidá y el propósitu últimu.

Caún d’estos viaxeros tan valientes representa una historia única, un camín singular marcáu por alcuentros fortuitos y desafíos inesperaos. Son llinies paraleles nel llenzu del tiempu, que se fusionen dacuando nun alcuentru caóticu y revelador. A lo llargo d’esta odisea, una maleta acompaña a los protagonistes, cargada de significáu: a veces un pesu, a veces una ayalga deseada.

Pero llega’l momentu inevitable, el destín final álzase énte ellos na forma de la muerte. La maleta ábrese, revelando los sos secretos, los sos mieos y aquello polo que nagüen. ¿Y agora, qué? ¿Qué nos queda cuando dexamos atrás esti mundu terrenal? Nun actu de celebración y resignación, los viaxeros despídense de la vida, sabedores de que, a lo último, namás llevamos con nosotros la carne y el sangre consumío pol tiempu.

La compañía:

Dana Raz (Israel, 1985) ye la coreógrafa de Dana Raz Dance Projects. L’artista desenvuelve lo más de la so carrera como baillarina na Kibbutz Contemporary Dance Company y nel 2013 impulsa DRD, cola que desenvolvió proyectos de danza contemporánea per toa España y en teatros d’Israel, Rusia, Francia, Italia, Grecia, etc. Wolves, nel 2016, y Muktzeh, nel 2019, son les obres más destacaes d’un repertoriu que se completa con diez pieces coreográfiques.

La compañía participa en festivales reconocíos: Open Look y Point Festival, en Rusia, Danza Xixón, Festival De Verano, La Red, Abril en Danza… n’España. Amás, impulsó proyectos como Trialogfem, que yá cumplió la tercer edición y tien como oxetivu dar visibilidá a la muyer como creadora dientro de la danza contemporánea.

Amás del so trabayu de creación, la coreógrafa pon workshops y procesos de creación en tol mundu.

Ficha artística:

• Repartu: Paula Fernández, David Grimaldi, Ignacio Sanz, María Fagundez.
• Autor textu: Hanoch Levin 
• Coreografía: Dana Raz 
• Música: Alex Aller 
• Escenografía: Luis Antonio Suárez
• Vestuariu: Luis Antonio Suárez
• Iluminación: Txus Plagaro
• Voces: María Fagundez, Livia Peverelli, Alex Aller y Dana Raz 
• Comunicación: Marta Perez
• Producción: Dana Raz Dance Projects