Abiertu’l plazu d’inscripción pa les actividaes profesionales de la muestra, que se va celebrar del 22 al 24 d’ochobre en dellos espacios de la Ciudá de la Cultura

07/10/2024.- Llaboral Ciudá de la Cultura va ser la sede de la segunda edición d’Escena en Rede, Muestra d′Artes Escéniques, que se va desenvolver del 22 al 24 d’ochobre nel marcu del programa Asturies, Cultura en Rede, un proyectu de la Conseyería de Cultura, Política Llingüística y Deporte realizáu en collaboracion colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.

Esta muestra sectorial dedicada a les artes escéniques busca crear un sitiu d’alcuentru profesional y comercial pa compañíes y profesionales asturianos, facilitar la comunicación, cooperación y intercambéu ente artistes, programadores y instituciones de la rexón; y dinamizar el sector, xenerando espacios pal debate y la reflexón y potenciando estilos y llinguaxes de creación nuevos.

El Teatru, el Paraninfu, les Cocines Vieyes y les sales 1, 2 y 3 de la Llaboral y el Teatru Alejandro Casona de la ESAD van acoyer les actividaes programaes nesta edición, qu’incluye producciones de La Westia Producciones; Dana Raz; Higiénico Papel Teatro; Factoría Norte; Camarión; É Vero Teatro; Teatro del Norte; Guayominí; Luz, Micro y Punto; Arlequina y La Líquida; Yheppa Títeres; Con Alevosía Teatro; Nun Tris, y Saltantes Teatro.

Actividaes pa profesionales: Asturies ProEscena

Güei ábrese’l plazu d’inscripción pa participar nes actividaes profesionales de la Muestra d’Artes Escéniques, qu’incluye talleres, sesiones de debate y presentaciones de proyectos artísticos. La inscripción n’Asturies ProEscena hai que la facer al traviés del formulariu disponible na web escenaenrede.asturiesculturaenrede.es primero del 17 d’ochobre, a les 12:00 hores.

N’Asturies ProEscena programáronse los talleres 10 claves para desarrollar con éxito un proyecto escénico, al cargu de Gustavo del Río, coordinador de Galicia Escena Pro; y Más allá de la programación de danza. Participación y mediación, que va impartir la xestora cultural Margarida Troguet. Trés sesiones de debate, alredor de les artes escéniques y el territoriu, l’I+D+I y el marcu llexislativu, y dos sesiones onde los creadores van poder mostrar los sos proyectos a programadores, distribuidores y otros profesionales qu’asistan a la Muestra completen les actividaes pa públicu profesional.

Amás, nesta Muestra d’Artes Escéniques tamién van poder vese espectáculos ufiertaos por compañíes asturianes, abiertos tanto al públicu profesional como a lo xeneral, con aforu limitáu. Proyectos de teatru, danza o títeres, en castellanu o asturianu, van representase en delles sales de la Llaboral tanto interiores como esteriores y con propuestes pa tolos públicos.

Les invitaciones disponibles pa cada espectáculu van poder sacase a partir del día 18 d’ochobre na Llaboral en Xixón, nel Centru d’Información Turística del Principáu (CITPA) n’Uviéu, nel Centru Niemeyer n’Avilés, vía telefónica nel 952 076 262, n’unientradas.es y na web de la Muestra.