Nel marcu de la Muestra ta prevista una xornada formativa d’estratexes aplicables pa la programación d’actividaes de mediación nel campu de les artes escéniques. 

L’oxetivu ye complementar la representación de les obres con acciones qu’ayuden a la formación y a la educación dende una perspectiva crítica y tresformadora. Por eso ye clave’l papel del programador, que ye’l nexu d’aunión ente l’espaciu escénicu y el públicu y, polo tanto, quien pue fomentar la organización d’actividaes d’acompañamientu artísticu. 

Xornada formativa "Mediación. Esa práctica innovadora pa los teatros y programes culturales locales"

Una actividá formativa a cargo de l’artista y xestora cultural Caterina Varela.

La mediación artística ye una práctica que rellaciona d’una manera asitiada la obra, trayectoria o universu referencial de los artistes coles persones. Esti conceptu de mediación llega a les artes performatives hai pocu tiempu –en comparanza cola mediación nos centros d’arte– p’abordar la necesidá de buscar elementos de conexón cola ciudadanía qu’ufierten un espaciu más anchu pa la tresmisión de conocimientu.

Anguaño, les artes performatives contemporánees –anque tean enfocaes a la producción d’obra– contienen investigaciones, práctiques y metodoloxíes que, a menudo, queden fuera de les programaciones culturales convencionales.

Esa gran ferramienta que ye la mediación artística considera esti gran campu de conocimientu como fonte pa rellacionar a la ciudadanía col fechu artísticu. Busca dar valor a tolo que contién una obra d’arte, tanto a lo que vemos dientro del escenariu como a lo que queda fuera.

Hai que tener en cuenta que’l comportamientu del públicu camudó muncho nos últimos tiempos. Anguaño, demándennos una rellación menos pasiva colos equipamientos culturales. Na so condición d’espectadores proactivos, busquen participar d’un mou más afectivu y multidireccional; en definitiva, más cercanu.

Imaxe: Paisaxes en construcción. Una práctica collaborativa con Manuel Rodríguez | Programación Espandida TRC Danza 2021

Caterina Varela desenvuelve la so carrera profesional nel campu de la danza y les artes vives, tanto na creación artística como na dirección y coordinación de proyectos de xestión cultural vinculaos a les residencies artístiques, la creación de públicos y la curaduría.

Dirixe la compañía de danza La Macana dende va 15 años, ye la fundadora y directora del programa Residencias Paraíso del Colectivo RPM; foi la responsable de la Programación Expandida TRC Danza del Teatro Rosalía de Castro d’A Coruña y punxo en marcha’l proyectu Cara a unha escena plural. Como profesional independiente, collabora con otres organizaciones como comisaria, mediadora y asesora, amás de participar como ponente en dellos alcuentros y foros sectoriales.

La sesión va tener llugar na Sala 3 de la Llaboral el martes 23 de mayu a les 16:45 hores y una duración de dos hores.

Les inscripciones pa participar nesta actividá van poder facese a partir del llunes 17 d’abril del 2023 nel Área profesional de la web.