Yá nun queda nada. Yá nun queda naide. Yá nada ye igual. Nada ye como enantes. Bono, non too. No que yera un cine, abandonáu, zarráu quién sabe cuándo, los ecos de los personaxes qu’un día sacaron entrada pa suañar con otros mundos proyectaos na pantalla grande siguen resistiéndose a les marees del tiempu.

Esta pantalla tampoco nun sobrevivió al escaecimientu. Y agora, nella, les úniques imáxenes proyectaes son dalgunos restos d’aquellos besos, ilusiones y despidíes en blanco y negro, seccionaes pola censura y el polvu de l’alcordanza.

El Cine María Cristina nun pue zarrar, nun ye posible. Non mentes tu sigas suañando la so historia. Non mentes tu garres con fuercia la entrada na mano. Mentes eso siga pasando, el nuestru acomodador va date la bienvenida cola poca lluz de la so llinterna, ayudándote a atopar el to asientu.

Y quiciabes, quién sabe, una mano averada va buscar la tuya na escuridá si lo escuro se fai demasiao escuro. Pue ser. Bienveníos al Cine María Cristina.

La compañía:

El Callejón del Gato Producciones, Premiu FETEN 2021 a la meyor adaptación escénica, Premiu Territoriu Violeta d’artes escéniques y igualdá, Premiu Xovellanos a la producción 2020 y Premiu Impulsa a la meyor empresa cultural y creativa 2017, ye una de les compañíes más afitaes del panorama teatral asturianu.

Los sos fundadores, Ana Eva Guerra y Moisés González, cuntaben yá con una trayectoria profesional estensa cuando nel 2007 deciden aunir esfuercios y concretar un proyectu d’investigación y creación escénica, cuntando pa eso con un equipu artísticu y técnicu de profesionalidá contrastada.

Dende la so creación, El Callejón del Gato estrenó más d’una ventena de producciones de formatos distintos y pa gran variedá de públicos, con atención especial hacia’l públicu mozo, apostando siempre polos llinguaxes teatrales nuevos y, según la crítica especializada, con un grau altu de calidá y rigor nes sos propuestes artístiques.

Ficha artística:

Dramaturxa y dirección: José Troncoso
Intérpretes: Ana Eva Guerra, Beatriz Canteli, Borja Roces, Manu Lobo y Moisés González
Asistente de dirección: Marino Villa
Vestuariu y caracterización: Ana Eva Guerra
Espaciu escénicu y aperios: Artilugio
Diseñu d’illuminación: Leticia López Karamazana
Espaciu sonoru: Mar Álvarez
Audiovisual: Fernando Cruz
Imaxe gráfica: Luis Barbolla
Fotografía: Pedro Timón
Comunicación: Elena Reales
Producción y distribución: El Callejón del Gato Producciones S. L.