La Biblioneta ye un motocarru vieyu tresformáu nuna casa-biblioteca, onde viaxa una muyer que se llama Eme. Cuando Eme llega a un pueblu o a una ciudá, abre la Biblioneta y, de la que muestra tolos sos secretos, cunta al públicu los rellatos ablucantes y les curiosidaes más prestoses de la isla Inaccesible y de los sos habitantes, el sitiu del qu’ella vien. Empara, pide a los neños y neñes que van escuchala que-y escriban histories qu’ella recopila depués en llibros colos que va enllenando los estantes de la Biblioneta.

Eme ye la bibliotecaria de Lugar, l’únicu pueblu habitáu de la isla Inaccesible. A los vecinos de Lugar présta-yos muncho lleer, pero, un día, un airón marcha con toles palabres de tolos llibros de la isla y los vecinos queden atristayaos dafechu. P’ayudar al so pueblu, Eme decide dir a buscar les palabres y les histories perdíes con un motocarru vieyu, la Biblioneta, onde va guardando los llibros que va recuperando nos sos viaxes pel mundu.

La compañía:

Mar Rojo Teatru naz n’Asturies nel añu 2010 de la mano de l’actriz, directora y dramaturga Mar Lombardo en coproducción col cineasta y artista multidisciplinar Francisco Javier Rojo Gómez. Comprometíos socialmente col arte, la educación y la infancia, buscamos siempre que los nuestros trabayos xeneren momentos únicos, que lleguen, emocionen y diviertan al espectador.

Los sos espectáculos xiraron per toa España y escoyéronlos en dellos festivales y circuitos de teatru profesional del nuestru país como: Circuito de Teatro Asturiano, Axenda didáctica escolar, Rede Galega de Teatros e auditorios, Red de teatros de CyL, Circuitos escénicos de CyL, Madrid Destino, Intermediae Madrid y/o Programa.cat de Cataluña.

Ficha artística:

• Intérprete: Mar P. Lombardo.
• Idea y dramaturxa: Mar Lombardo.
• Dirección: Mar Lombardo y F. Javier Rojo Gómez
• Ayudante de dirección: Aída Valladares.
• Vestuariu: Lady Cake.
• Música: Bubble.
• Diseñu y construcción d’escenografía: F. Javier Rojo Gómez, Berly Nuñez y Jose Beneyto.
• Títeres: F. Javier Rojo Gómez
• Espaciu escénicu y títeres: F. Javier Rojo Gómez.
• Illuminación: F. Javier Rojo Gómez
• Soníu: F. Javier Rojo Gómez.
• Ilustración: Alicia Varela.
• Producción: Mar Rojo Producciones